Kolka er eins árs í dag eins og systkini hennar í Finnlandi. Hún er ánægð með það eins og sést á myndinni :) Myndin er tekin á keyrslu - en uppáhald hennar er að stinga hausnum út um bílgluggann, fá vindinn í andlitið og þefa af umhverfinu.

Við höfum ekki getað gefið okkur tíma til að skrifa hingað eða setja inn myndir í langan tíma - Dagbjört var að klára BA verkefnið sitt í bókasafns- og upplýsingarfræði og Bjarni að koma hönnunarfyrirtækinu EKKERT í gang.

Kolka byrjaði að lóða í fyrsta skiptið fyrir 5 vikum - rétt eftir 10 mánaða afmælið sitt. Síðan gerðist eitt mjög skemmtilegt. Ásta Dóra hundaþjálfari hjá Gallerí Voff þar sem við vorum með Kolku á hlýðninámskeiði hafði samband vegna þess að hún hafði verið beðin um að finna hund í sjónvarpsauglýsingu fyrir Þýskt tryggingarfélag. Henni fannst Kolka svo sæt og með fallegar hreyfingar. Hún kom og tók mynd af henni sem hún sendi út ásamt myndum af fleiri hundum.

Hún fékk svo hlutverkið og fór með Ástu Dóru, kvikmyndatökuliði og leikurum vestur á Snæfellsnes þar sem auglýsingin var tekin á hvítum söndum. Allt gekk vel og skemmti hún sér konunglega. Við fengum að sjá grófklipp af auglýsingunni - hér sjáið þið tvær stillimyndir úr henni.

Svo vorum við að setja inn nýjar myndir líka - endilega skoðið þær.