Polski Owczarek Nizinny - ræktunarmarkmið

FCI-Staðlar Nº 251 / 07. 08. 1998 /
Upprunaleg þýðing úr pólsku yfir á ensku: Mrs. Peggy Davis
Fyrst útgefið: 07.08.1998
Hér í lauslegri þýðingu okkar

Gagnsemi: Getur gagnast í ýmsum hlutverkum, bæði sem fjárhundur og varðhundur og í þéttbýli sem mjög góður félagi.

F.C.I flokkun: Tegundahópur 1, fjár- og hjarðhundar. Flokkur 1 - fjárhundar. Vinnuprófs ekki krafist.

Heildarsvipur: Pólski sléttusmalinn er meðalstór, fyrirferðalítill, vöðvastæltur með síðan þykkan feld. Vel hirtur feldurinn gefur aðlaðandi og áhugavert útlit.

Mikilvæg hlutföll: Hlutföll hæðar við herðarkamb á móti lengd líkama er 9:10. Hlutfall lengdar trýnis á móti höfuðkúpu er 1:1, samt getur trýnið verið örlítið styttra.

Hegðun og skapgerð: Líflegur en með góða sjálfstjórn, árvakur, lipur, snjall, skarpur og með mjög gott minni. Þolir vel óhagstætt loftslag.

Höfuð: Miðlungs, í réttum hlutföllum og ekki of stórt. Þykkur feldur á enni, kinnum og höku sem lætur höfuðið sýnast umfangsmeira en það er.

Höfuðsvæðið:

Höfuðkúpa: Ekki of breiðleit, nokkuð ávöl.

Andlit:
Nef: Eins dökkt og mögulegt er, í samræmi við lit feldsins, með stórar nasir.
Trýni: Meðallangt, nefbrú bein.
Varir: Liggja þétt að kjálkum, brúnir þeirra í sama lit og nef.
Bit og tennur: Kjálkar og tennur mynda skærabit.
Augu: Í meðallagi stór, möndlulaga, hnotubrún með líflegu og stingandi augnaráði. Ytri rönd augnloka eru dökk.
Eyru: Hangandi, sitja frekar ofarlega, í meðallagi að stærð og hjartalaga. Þau eru breiðari við höfuðið og framendinn liggur þétt við vanga. Eyrun eru mjög kvik og hreyfanleg.

Háls: Í meðallagi langur, vöðvamikill, án húðfellinga og liggur fremur láréttur.

Bolur:
Útlína: Rétthyrnd fremur en ferningslaga.
Herðakambur: Áberandi.
Bak: Beint, vöðvamikið.
Lend: Breið og og vöðvamikil, stutt og snögg.
Brjóstkassi: Djúpur, miðlungs breiður, rifbein hvorki flöt né hringlaga.
Kviður og magi: Útlínur mynda glæsilega sveigju í átt að afturhlutanum.

Skott:
• Stutt: Náttúrulega stutt eða kubbslegt eða mjög stutt stíft skott (sem er ekki leyft á Íslandi).
• Sítt: Frekar langt og mjög hárprútt skott. Í hvíld hangir skottið. Ef hundurinn er í viðbragðsstöðu er skottið líflega bogið yfir bakið, aldrei upprúllað eða liggjandi á bakinu. Ef skott er miðlungslangt er það borið á mismunandi hátt.

Útlimir:

Framfætur: Horft framan frá: Samsíða og beinir. Gott jafnvægi í stöðu vegna sterkar beinagrindar.
Bógar: Herðablöð breið, í meðallagi að lengd, skástæð, mjög vöðvastælt og sterkbyggð.
Kjúka: Hallar örlítið með tilliti til framhandleggs.
Loppur: Sporöskjulaga, tær liggja þétt og eru aðeins hvelfdar. Þófar eru mjög stinnir. Neglur stuttar og svartar.

Afturfætur: Þegar horft er aftan frá: Samsíða beinir og sterkbyggðir. Liggja þétt og eru sporöskjulaga.
Læri: Breið og vöðvamikil.
Hæklar: Nokkuð áberandi.

Göngulag/hreyfingar: Liprar, svífandi og mjúkar hreyfingar án mikilla lóðrétta hreyfinga. Hann skeiðar oft þegar hann gengur hægt.

Húð: Passar vel og er án fellinga.

Feldur:
Hár: Allur líkaminn þakinn grófum, þéttvöxnum og þykkum hárum í miklu magni. Undirlagið er mjúkt. Feldurinn er sléttur eða örlítið liðaður. Hár á enni hylur augu sem er einkennandi fyrir tegundina.
Litur: Allir litir og blettir eru leyfilegir.

Stærð:
Hæð að herðarkambi:
Rakkar : 45 - 50 cm.
Tíkur : 42 - 47 cm.
Tegundin er vinnuhundur og verður því að halda ákveðnum staðli í stærð. Hann má því ekki vera of lítill, veikburða eða viðkvæmur.

Gallar: Öll frávik frá ofangreindum viðmiðum ættu að teljast gallar. Alvarleiki hvers galla ætti að vera í réttu hlutfalli við hversu mikill gallinn er.

ATH!: Rakkar ættu að hafa tvö heilbrigð eistu sem hafa að fullu gengið niður í punginn.